Ձեր վստահելի աղբյուրը

«Իրազեկ և պաշտպանված սպառող» հասարակական կազմակերպության կողմից պաղպաղակի շուկայում իրականացված ուսումնասիրության արդյունքում պարզվել է, որ լաբորատոր փորձաքննության արդյունքում հայտնաբերված սխալ մակնշած և ցածր որակի պաղպաղակները դեռ դուրս չեն բերվել շուկայից»,- Panorama.am-ին հայտնեց հասարակական կազմակերպության նախագահ Բաբկեն Պիպոյանը:

Վերջինս նշեց, որ խնդիրը մեկ շաբաթից ավելի է կա, սակայն վերացված չէ, մինչդեռ ՀՀ ԳՆ սննդամթերքի անվտանգության պետական ծառայությունն ունենալով բոլոր լծակները, պետք է այդ պաղպաղակները շուկայից հետ կանչվեին: «Եթե պարզվի, որ պաղպաղակները խնդիրներ չունեն, միայն մակնշման հարցն է, ապա կարելի էր աչք փակել, բայց այս դեպքում տեսնում ենք, որ պաղպաղակներում խնդիր կա և մակնշման պահանջների բացակայությունը սխալ է»,- ասաց Բ.Պիպոյանը` հավելելով, որ եթե հանրային ճնշում չլինի, ապա խնդիրն այդպես էլ կմնա: «Ւ վերջո, մեր նպատակը ոչ թե խնդիրների մասին խոսելն է, այլ խնդիրներին լուծում տալը»,- ասաց նա:

ՀՀ ԳՆ սննդամթերքի անվտանգության պետական ծառայության տեղեկատվության և հասարակայնության հետ կապերի բաժնի պետ Ռոզա Ավագյանն էլ մեզ հետ զրույցում նշեց, որ խնդիրը վերաբերում է կարագի կամ բուսական յուղի կիրառմանը, այլ ոչ թե սննդամթերքի վտանգավորությանը:

«Փորձաքննությունը իրականացրել է «Սուր անկյուն» հաղորդաշարը, իսկ Ծառայությունը աջակցել է պրոֆեսիոնալ նմուշառում իրականացնելու հարցում: Մենք պաշտոնական գրությամբ դիմել ենք հաղորդաշարին, որպեսզի լաբորատոր փորձաքննության արդյունքները տրամադրեն մեզ, սակայն դեռ դրանք չենք ստացել, հետևաբար, չենք կարող այդ տեղեկատվությունը տնօրինել»,- ասաց նա` հավելելով, որ ՍԱՊԾ-ն կաթնամթերքի շուկայում շարունակում է դիտարկումներ իրականացնել և առաջիկայում կհրապարակեն դրանց արդյունքները:

Նշենք, որ այսօր «Իրազեկ և պաշտպանված սպառող» հասարակական կազմակերպությունը տարածել էր հաղորդագրություն, որում նշված էր, որ «Սուր անկյուն» հաղորդաշարը ռեպորտաժներից մեկում անդրադարձել է պաղպաղակի շուկայում առկա խնդիրներին: Մասնավորապես, ՀՀ ԳՆ սննդամթերքի անվտանգության պետական ծառայության տեսուչների հետ համատեղ իրականացվել է նմուշառում, և արդեն կոդավորված նմուշները հանձնվել է լաբորատոր փորձաքննության: Տեսանյութում կոդավորումն իրականացնելիս պարզ է դառնում, որ «Թամարա», «Էլիտ շանթ», «Աշտարակ կաթ», «Անի», «Բիոկաթ», «Ասա», «Գրանդ քենդի», «Չանախ» և «Արմսվիթ շանթ» ընկերություններից «Թամարա», «Էլիտ շանթ», «Աշտարակ կաթ», «Անի», «Բիոկաթ», «Ասա» և «Չանախ» ընկերությունների կողմից արտադրված նմուշառված ապրանքատեսակները չեն համապատասխանում մակնշման պահանջներին: Լաբորատոր փորձաքննության արդյունքում պարզվել է, որ պաղպաղակներում (բացառությամբ «Բիոկաթ» ընկերության կողմից արտադրված պաղպաղակի) օգտագործված է մեծ քանակությամբ բուսայուղ (սփրեդ):

«Հունիսի 22-23-ին «Իրազեկ և պաշտպանված սպառող» հասարակական կազմակերպության կողմից իրացման ցանցում իրականացված ուսումնասիրության արդյունքում պարզվել է, որ սխալ մակնշած և ցածր որակի պաղպաղակները դուրս չեն բերվել շուկայից, այն դեպքում, երբ սխալ մակնշումը վերոնշյալ Ծառայության համար հիմք էր ցածր որակի պաղպաղակը շուկայից դուրս բերելու. դեռ ավելին՝ դիտարկման արդյունքում հնարավոր էր իրականացնել նաև նմուշառում՝ պարզելու արդյոք այդ ապրանքն անվտանգ է, թե ոչ»,- նշված է հաղորդագրությունում: